ඔබේ දරුවා තැලසීමියා රෝගියෙකු වීම වළක්වාගන්නේ කොහොමද ?
ඔබගේ ලෙයින් හෙට උපදින දරුවා තැලසීමියා ( Thalassaemia ) රෝගියකු වීමේ අවදානමෙන් ගලවා ගනිමු !
විවාහ ගිවිස ගැනීමට පෙර, තැලසීමියා (Thalassaemia) පරීක්ෂාවක් සිදු කර ගැනීමේ වැදගත්කම දන්නවාද ? 👨👩👧👦
ඔබේ පෙණහලු වලට ඇතුළු වන ඔක්සිජන් ශරීරය පුරා බෙදා හරින්නේ, ඔබේ ලේ වල ඇති රතු රුධිර සෛල මගිනුයි. රතු රුධිර සෛල රතු පැහැති වන්නේ හිමෝග්ලොබීන් නිසයි.
තැලසීමියා රෝගය වැළඳුණු රෝගියකුගේ හිමෝග්ලොබීන් වල ඇති, ග්ලෝබීන් කියන ප්රෝටීනය නිපදවීම අඩාල වෙනවා. 🩸
මේ නිසා, තැලසීමියා රෝගියකුගේ රතු රුධිර සෛල, ඉක්මනින් බිඳීමට පටන් ගන්නවා. සාමාන්ය කෙනෙකුගේ රතු රුධිර සෛලයක ආයු කාලය මාස හතරක් වුණත්, තැලසීමියා රෝගියකුගේ එම කාලය මාසයක් දක්වා අඩු වෙනවා.
තැලසීමියා රෝගය වැළඳුණු දරුවකුගේ රෝග ලක්ෂණ, ඔහුගේ ජීවිතයේ පළමු වසර තුළදීම ඇති වෙනවා.
තැලසීමියා (Thalassaemia) රෝගයේ රෝග ලක්ෂණ මොනවාද ? 🤔
- ⚠️️ රතු රුධිරානු බිඳී යාම නිසා ඇගේ ලේ අඩු වීම ( ඇනීමියාව ) ඇතිවෙනවා. දරුවා සුදුමැලි වෙනවා. ක්රියාශීලීත්වය අඩුවෙනවා. ඇතැම් විට කිරි බොන්නට නොහැකිව හතිය හැදෙනවා.
- ⚠️️ අක්මාව සහ ප්ලීහාව ඉදිමීම නිසා උදරය ඉදිරියට නෙරා එනවා. දරුවා කහ පැහැයට හැරෙනවා.
- ⚠️️ ඇට මිදුලු පුළුල් වීම නිසා මුහුණේ හැඩරුව වෙනස් වනවා.
- ⚠️️ රතු රුධිරානු බිඳී යාමෙන් සහ නිතර රුධිරය ලබාදීමෙන් ඇගේ එකතු වන යකඩ, අක්මාව හදවත වැනි අවයව සහ, අග්න්යාශය පිටියුටරිය වැනි හෝමෝන නිපදවන ග්රන්ථිවල තැන්පත්වීම නිසා එම අවයව වල ක්රියාකාරිත්වය අඩු වෙනවා.
- ⚠️️ දරුවාගේ වර්ධනය අඩාල වෙනවා. නිතර පහසුවෙන් ලෙඩ රෝග වලට ගොදුරු වෙනවා.
තැලසීමියා රෝගය වැළඳෙන්නේ කොහොමද ?
දරුවෙකු පිලිසද ගැනීම සිදුවන්නේ මවගේ සහ පියාගේ ජාන කොටස් බද්ධ වීමෙනුයි. අපේ හැඩරුව ක්රියාකාරිත්වය තීරණය වෙන්නේ දෙමව්පියන්ගෙන් අපට ලැබෙන ජාන අනුවයි.
යම් ජානයක් අසාමාන්ය වුණොත්, ඊට අදාළ වන රෝගයක් දරුවන්ට හැදෙන්න පුළුවන්. තැලසීමියා රෝගය වැළඳෙන්නේ, මේ විදියේ අසාමාන්ය තැලසීමියා ජානයක් නිසයි.
ඔබට තැලසීමියා රෝගය වැළඳී නොතිබුණත්, ඔබේ ඇඟේ අසාමාන්ය තැලසීමියා ජානය තිබෙනවා නම්, ඔබේ දරුවා පිළිසිඳ ගැනීමේදී, ඔබෙන් දරුවාට එම ජානය ලැබෙන්න පුළුවන්. මෙහිදී ඔබව රෝග වාහකයකු ලෙස හඳුන්වනවා.
මව සහ පියා දෙදෙනාම රෝග වාහකයින් නම්, ඒ කියන්නේ දෙදෙනාටම අසාමාන්ය තැලසීමියා ජානය තිබෙනවා නම්, ඔවුන්ගෙන් උපදින දරුවා තැලසීමියා රෝගියකු වීමේ අවදානමක් තිබෙනවා. ඊට හේතුව, මව සහ පියා දෙදෙනාගෙන්ම අසාමාන්ය ජානය දරුවාට ලැබී, දරුවා රෝගියෙකු වීමට, 25%ක ඉඩක් තිබීමයි.
එක් සහකාරයකු ගෙන් අසාමාන්ය ජානය ලැබී, අනෙක් සහකරුගෙන් සාමාන්ය ජානය ලැබුණොත්, දරුවා රෝග වාහකයකු වෙනවා.
💠 වැදගත්ම කරුණ, ඔබ තැලසීමියා වාහකයෙකු නොවේනම්, ඒ කියන්නේ අසාමාන්ය තැලසීමියා ජානය ඔබට නැතිනම්, ඔබ තැලසීමියා වාහකයෙකු හෝ, රෝගීයෙකු සමඟ විවාහ වුණත්, ඔබේ දරුවාට තැලසීමියා රෝගය වැළඳෙන්නේ නැහැ.
✅ ඉතින් ඒ නිසා දෙමව්පියන්ට දෙදෙනාගෙන් එක් අයෙකු හෝ වාහකයකු නොවේ නම්, දරුවාට තැලසීමියා රෝගය වැලඳෙන්න කිසිම ඉඩක් නැහැ.
තැලසීමියා රෝගය වළක්වා ගන්නේ කොහොමද ?
- ✅ විවාහය සඳහා සහකරු හෝ සහකාරිය තෝරා ගැනීමට පෙර, රුධිර පරීක්ෂාවක් මගින් ඔබ වාහකයකු දැයි හඳුනා ගන්න. ඔබ වාහකයකු නම් රෝස පැහැති කාඩ්පතක් ද, වාහකයෙකු නොවේ නම් කොළ පැහැති කාඩ් පතක් ද ඔබට ලබා දෙනවා.
- ⚠️️ ඔබට ලැබෙන්නේ රෝස පැහැති කාඩ්පතක් නම්, තවත් රෝස පැහැ කාඩ් පතක් තියෙන කෙනෙක් සමග විවාහ වීමෙන් වළකින්න.
දැනට ශ්රී ලංකා ජනගහනයෙන් 3%ක් තැලසීමියා රෝග වාහකයන් බව ඇස්තමේන්තු කර තිබෙනවා. ශ්රී ලංකාවේ සෑම ප්රදේශයකම රෝගීන් හඳුනා ගන්නා අතර, උතුරු මැද, වයඹ, ඌව සහ මධ්යම පළාත්වල රෝගීන් බහුලව වාර්තා වෙනවා.
විවාහයට පෙර තැලසීමියා රුධිර පරීක්ෂාවක් සිදු කර ගැනීම මගින්, තැලසීමියා රෝගය වළක්වා ගැනීමට පුරවැසි වගකීම ඉටුකරමු.
රෝග පරීක්ෂා සඳහා අවශ්ය විස්තර පහත අංක වලින් ලබා ගැනීමට පුළුවන්.
- තැලසීමියා සහන පියස, රාගම – 011 2 959 642
- තැලසීමියා මධ්යස්ථානය, කුරුණෑගල – 037 222 2261/ 62
- තැලසීමියා මධ්යස්ථානය, අනුරාධපුර – 025 222 2261
- තැලසීමියා මධ්යස්ථානය, බදුල්ල – 055 222 2261